Ngubani Umlisa?

EHOGO EMKHIWENI KONGUNDU
INzwananzi yehlukana phakathi lapho uMathukuthela esuka kuMaledanisa uMagutshwa labantu bakhe. Waphuma labantu bakhe waya eHogo. UMathukuthela wakha umuzi wakhe ehogo. Indawo le yabizwa ngokuthi kusemkhiweni koNgundu. Ikhona indawo enjalo lalamuhla eHogo. Indawo le ibizwa ngejaha elidala likaMathukuthela uNgundu. UMaledanisa wayeyinduna kaMathukuthela, kodwa behlukana ngesikhathi uMathukuthela esesiya eHogo lapho afika waba ngumlisa. Yikho lamuhla singabalisa kwethu. Bebuphethwe nguNkomombi ubulisa kodwa utshonile. Ufengendlela ebuhlungu uNkomombi, engasaboni kanti njalo wayesefelwe ngumfazi. Lamuhla obambileyo nguNdlalifa yena ebambele uyise uLyfert.

Ngubani okufanele aphathe ubulisa bakwethu?

Sengitshilo phambilini ukuthi ubulisa bakwethu baqala njani. Baqala ngoMathukuthela wasebutshiyela uNgundu. Ijaha elidala likaNgundu nguJuta. Kwathi ekufeni kuka Juta, ubulisa basuka baya endlini elandelayo ekaSibangani. UNkomombi uzalwa nguNgundu emzala loMabende. UNkengiwa wayebambele ijaha lisakhula kwathi ekukhuleni kwalo laphiwa ubulisa labusa. Amajaha kaNgundu ami kanje:
UJuta,
UBen Ndevuzibomvu ezala uNdodana,
uMxotshwa yena ezala uLisi,
UNkomombi ezala uMlamuli loLyfert.

Uhlupho lwaqala ukufa kukaNgundu. Esefile uNgundu, uSibangani wahlala inaka umfazi kaNgundu omncane ozala uNkomombi. Ekufeni kukaNgundu, abadala baphuma ukuze balahlise umoya owawusukhona ekhaya. Ekuphumeni kwabo, kwakufanele baqhube isiko elithile andubana bakhulumisane labantu balapha ekhaya. Lokhu akusenziwanga ngendlela yakhona. Ngiqonde imbali hatshi umbango, ngakho buza abadala bazakutshela okwenzakalayo. Mina bangitshela kodwa ngibone kukuhle ukuthi lokhu ngingakulobi ngoba ngingazi ukuthi lokhu kungalethani kundeni wakwethu. Umoya owawuqeda abantwana wawuvela koMdalimane. UMpophoma wafela enkomeni elusile. Iqiniso ngemfa yakhe ngiyalazi, kodwa ngikhethe ukuliceza leloqiniso. USibangani nguye owayesesele engubaba, wamgcoba engamgcobanga uJuta ubukhosi indodana enkulu kaNgundu. Wazula zula umoya waphangalala uJuta eselijaha. Sibangani wasethatha ubukhosi wabusa endlini encane koNkomombi. Ubukhosi lobu badala inkulumo kusukela ukutshona kukaNgundu, ngoba uMswelanto, uMjabuli lo Nkengiwa babeka amakhanda ndawonye bayisola indlela ubukhosi obaqhutshwa ngayo. Bobathathu bambiza uSibangani bakhuluma laye ngale indaba, kodwa kwehlula ukuthi bayiqondise. Bamkhalalela ubukhosi uSibangani, bamtshela ukuthi abasuthiseki ngendlela abantwana abafa ngayo njalo lokuthi ubukhosi sebukhutshiwe endlini yakhona eqondileyo. Ungalibali phela ukuthi kwenzakala konke lokhu uSibangani wayesethethe umfazi kaNgudu omncane unakaNkomombi. Ubukhosi busendlini yakoNkomombi ngokukhalalelwa katshi ngomthetho. Imbuzi izele amazinyane amathathu, elimhlophe, elimnyama, lelibomvu elilempumulo emhlophe, ikhotha elibomvu lelimhlophe ibisitshiya lelo elilempumulo ebomvu kuthiwe yekeleni yikwenza kwayo. Kukhona okukhona ,kanti baphela abantwana bendlu yinye kaNgundu yindaba? Abanye abantwana bakaNgundu yilaba:
uMnindwa
uZondiwe
uMpophoma
uNjayabo
uJuta.
Nxa busuka kuNkomombi buzakuya kubani? Abasekho abadala abaziyo iqiniso ngale indaba kanti njalo abaseleyo bakhethe ukuthula bayekele izinto zisonakala ngamandla. Bangaze bakhulume ngale indaba ngubani ozabalalela? Ufile uNkomombi ngo 2008, abukhosi babuqhubele uLiyfert indodana kaNkomombi, osephinde wabudlulisela kundodana yakhe uNdlalifa. UMzanywa untaka Sibangani kanti laye esaphila wake wayiphatha indaba yobukhosi ebufuna ngoba ezibona elalo ilungelo lelo.
Indlu yakoDuma ithule kanti layo ilawo amandla okubusa. Imbali iyakuveza sobala ukuthi umaNdlovu ozala uDuma yiyo intombi kaMathukuthela yakuqala azikhombisela yona. Bekuthethelwa koDuma ngenxayani? Abantwana bakaDuma nampa: uNonoka uLinda uEllias uMzila uNowa UNonoka uzala uObert lo Nkosiyabo kanti laba yibo abalelungelo lokubusa. Bakhuluma ngabo lobubukhosi abantwana bakaDuma. Asazi ukuthi izaphathwa njani lindaba. Abadala bayakwazi kanti thina sikhulekela ukuthula lamaqiniso ngembali yakwethu.
USibangani watshiyela uMalinga –Dzwayi ubukhosi ngesikhathi esesiya eZambia. UMalinga wafa efakelwa etshwaleni. UMalinga wafa mahlayana nje kanti kwakunga jongwanga yena, kwakufekelwe unakaSivori. Unaka Sivori nguye owayecele lobotshwala kodwa bathi ngokuphuza ukubuya wabukhalala. UMalinga wabuthatha wasola isenzo sikanakaSivori sobukhwele watsho wazinathela. Lamtshonela uMalinga. Watsho eqeda ukunatha wathi:

“utshwala bakho maNdebele sebungihambe kubi”

Wasuka lupho wadiyazela eseqonda ngekhaya kodwa wehlulekela koEnock. Wawa bamthwalela ngekhaya kodwa waphela ngemva kwesikhathi esifitshane efike emzini wakhe. Basuka lapho ubukhosi baya kuNkomombi. Wayekhona uSibangani, ngoba nguye owalahla uMalinga. USibangani-Mabhensa wahamba loRodger, Khiyiwe loKhawudeni. Watshiya uPolly-Poison, uMbulawa, Genesiyo (oliphilisa) Mzondeki loMzanywa.