Ukusinda kukaMathukuthela 2, amandla obunyanga

UMathukuthela wayeyinyanga njalo elamandla esabekako. Wasuka eBhelingwe loMnethi inkosi ifuna ukumbulala. Behluleka ukubabulala ngoba uMathukuthela wayezi vikele ngemigcozo.Wayezilungise ngophini lange pitikoti yesalukazi isiyisithutha.Wakuthatha waku bhodonga ngemithi ephezulu kwamvikela elakeni lwamabutho enkosi. Kanengi inkosi ithumela amabutho athenjiweyo ukuthi azulise uMathukuthela loMnethi. Yonke imizamo yehlula. Ayethi nxa esiza amabutho, uMathukuthela wayetshela abantu bakhe ukuthi baphume emagumeni abo bayecatsha egangeni,kuthi yena loMnethi balilindele ibutho lona elalisiza ngolaka. Lalithi nxa lisiza ibutho,bona bathathe izihlalo zabo bahlale phandle. Azakuthi nxa esebanga koMathukuthela amabutho,aphelelwe ngamandla,imicabango, baphenduke izithutha. Bazabhoda lomuzi wonke bewumana nje bekhuluma yonke imfihlo bafane lomuntu osebuthongweni ophupha ebindana labathakathi.

Igusu elihle elile mihlobo yonye yemithi. Imithi yesintu iyinqaba.


Bazadela babizane bafulathele kodwa bale lokhu bemsongela.Bangatshibilika babheke emuva,imicabango lamanda kuze njalo.Bazanxapha baqale ukuphikisana bodwa beze baphose badumelane.Bazasonga bamthembise elakusasa. Ilanga ililandelayo kuzaba ngesifanayo.Sonke isikhathi nxa ibutho lizakuza, babehlala phandle bagoqe izandla balilindele.Inkosi yakhalimela ibutho lathenjiswa ugodo aluba bengezanga labo.Ngelanga lokucina inkosi yabahaqaza ngembabazane ngaphansi yabathembisa okwedlula lapho aluba bengezanga lomswane kaMathukuthela. Lasonga ibutho lahamba ngamakhulu amandla langolaka. Konke lokhu kwenzakala nje uMathukuthela wayekhanyisa akubone konke. Laye uzazivikela ngamandla. Lizafika ibutho likhuleke lethule ingwane
likhale ngelanga langokoma, uMathukuthela uzabagolomba balitsho iqiniso lohambolwabo. Ekucineni omunye wacela ukuthi abasize olakeni lwenkosi ngokuvuma ukuthi bahambelaye njelokhu. Inkosi yacina inanzelela amandla kaMathukuthela yacina isimbiza ukuthi keze esigodlweni inkosi ifuna ukukhuluma laye. Inkosi yathumela ibutho elilemvunulo yokuthula. UMathukuthela walungisa imithi yakhe walubhekisa enkosini. Lapho kwasekusobala ukuthi inkosi isifuna ukuthi alondolozwe emehleni ayo. Labo ababethunywe okokuqala inkosi yabethesa icala lokwehluleka ukufeza umsebenzi wenkosi. Wathi efika enkosini, kufanele abulawe engakangeni esangweni, kodwa ikosi yezwakala isisithi abamdedele angene ngesango ngoba inkosi ilamagama athile laye. Wangena uMathukuthela wayakhothama enkosini. Inkosi yambuza ukuthi kungani esehlula amabutho njalo lokuthi uyinyanga na? Wavuma ukuthi uyinyanga kodwa ukuthi wehlule ibutho wakulandula. Watsho futhi ukuthi sonke loso sikhathi ibutho lisiza lalimthola ekhona elilindele kuphela ibutho kwakufanele lenze elikuthunyiweyo.

‘’ibutho liza liphethe izwi lenkosi, basebenza ngamandla abawaphiwe yinkosi ngokunjalo bamele inkosi, ngingubani mina engingeqa izwi lenkosi ngilwise izikhonzi zenkosi na, ngiqhubeke ngisingethwe ngamaphiko engqungqulu na?”

Inkosi yathi izamlibha ngokumethesa umlando wokuthi athame ibutho andubala liphume. Wasinda kanjalo uMathukuthela. Wasephiwa abantu wayahlala eMakhandeni. Walungisa elakhe ibutho layahlasela. Kulapho ibuthu ilathumba khona umaBhebhe uyisekazi kaZunguza. UmaBhebhe waphiwa uMnethi. UmaBhebhe ngunina kaMandindo. Wafica kudliwa lapha ekhaya wasecela ukuyavakatshela kibo. Waphiwa amadoda amane ukuthi amqhube. Wafika watshela abakibo ukuthi “nyika ibete” wacebisa ukuthi kabeze bazokhonza. Beza ke abantu ngobunengi.

Kanti inkosi yayifuna kumbulalalani uMathukuthela?
Kakuveli obala imbangela yomsongo wenkosi ongaka ngo Mathukuthela. Izolo sibone uMagutshwa ethi uMnethi uyamsinda ngakho ucela inkosi ukuthi imsuse koMagutshwa. Kanti wayeza sinda uMagutshwa yedwa njani? Abantu babemhlonipha kanti njalo bembiza ngelenkosi. Wayeyinyanga elamandla amabuzwayo. Wayenga phumi ekamabeyaze. Waye nothile, elezifuyo, elomvelabahleke, lesidumo, esinda njalo ehlonitshwa. asikhulumi
ngokuhlakanipha lokuqedisisa izihlahla. Wayeyinyanga elodumo eyaphuma lesikhuni sivutha emanzini. Zonke lezi izizatho zazi ngahle zimdalele inzondo kubakhula bakhe. Ngeqiniso izizatho zokufuna ukubulawa kwakhe azivelanga obala.